پاکستان کرکٹ بورڈ نے قومی ٹیم کے کپتان بابراعظم، محمد رضوان اور شاہین شاہ آفریدی سمیت دیگرکھلاڑیوں کی ماہانہ تنخواہ میں اضافے کا فیصلہ کرلیا ہے۔
سابقہ کنٹریکٹ کے تحت ٹیسٹ میچ کا ماہانہ معاوضہ ساڑھے 10 لاکھ جبکہ ونڈے اور ٹی ٹوئنٹی کھیلنے والوں کو ساڑھے 9 لاکھ روپے دیا جاتا تھا لیکن نئے چیئرمین نے خزانے کا منہ کھول کر کھلاڑیوں کی تنخواہ میں کئی گنا اضافے کا اعلان کیا ہے۔
گزشتہ کنٹریکٹ کے دوران کھلاڑیوں کی میچ فیس میں 10 فیصد اضافہ کیا گیا تھا، ٹیسٹ میچ فیس 8 لاکھ 38ہزار 530، ون ڈے انٹرنیشنل 5 لاکھ 15 ہزار 696 جبکہ ٹی20 انٹرنیشنل فیس 3 لاکھ 72 ہزار 75 روپے تھی، جو کہ تمام کیٹیگریز کے پلیئرز کو یکساں ملتی تھی۔
پی سی بی حکام کا کہنا ہے کہ آئی پی ایل میں شرکت نہ کرنے کی وجہ سے پاکستانی کرکٹرز دنیا کے دیگر کھلاڑیوں کی طرح کمائی نہیں کرپا رہےجس کی وجہ سے اے کیٹیگری کے کھلاڑیوں کو سال میں ایک لیگ کا این او سی، بی کیٹیگری کو دو لیگز جبکہ سی کیٹیگری کو سالانہ تین لیگز میں شرکت کی اجازت تھی۔
یاد رہے کہ پاکستان کرکٹ ٹیم کیلئے کھیلنے والے کھلاڑیوں کو ماہانہ لاکھوں روپے تنخواہ ملتی ہے جبکہ میچ کھیلنے پر ہر میچ اور ٹیسٹ کی صورت میں ہر دن کا الگ معاوضہ ہوتا ہے۔ اس کے علاوہ مختلف لیگز اور اشتہارات کیلئے کھلاڑیوں کو الگ سے لاکھوں روپے ملتے ہیں۔