پاکستان ٹیم کے کپتان اور دنیائے کرکٹ کے مایہ ناز بلے باز بابر اعظم نے سری لنکا کیخلاف میچ میں شاندار فتح کے بعد گراؤنڈ اسٹاف کے دل جیت لئے۔
پاکستان نے گزشتہ روز سری لنکا کیخلاف ریکارڈ ساز جیت درج کی تھی، راجیو گاندھی انٹرنیشنل اسٹیڈیم حیدرآباد میں کھیلے جانیوالے میچ میں سری لنکا نے 50 اوورز میں 9 وکٹوں کے نقصان پر 344 رنز بنائےجس میں کوشال مینڈس 122 اور سمارا وکرما 108 رنز بناکر نمایاں رہے۔
قومی ٹیم نے 4 وکٹوں کےنقصان پر 49 ویں اوور میں 345 رنز کا پہاڑ جیسا ٹارگٹ حاصل کرلیا،ورلڈکپ کا پہلا میچ کھیلنے والے عبداللہ شفیق نے 113 جبکہ محمد رضوان شاندار 131 رنز بناکر ناٹ آؤٹ رہے۔
سری لنکا کے خلاف فتح کے بعد پاکستان ٹیم کے کھلاڑی حیدرآباد دکن کے گراؤنڈ اسٹاف کے ساتھ گھل مل گئے اور اسٹاف کے ہمراہ تصاویر بنوائیں جبکہ کپتان بابراعظم نے اسٹاف کو اپنی جرسی بھی تحفے میں دی۔
آئی سی سی نے پاکستان کرکٹ ٹیم کے کھلاڑیوں کے گراؤنڈ اسٹاف کے ساتھ گزارے لمحات کی ویڈیو بھی شیئر کی جس کو مداحوں کی جانب سے خوب سراہا جارہا ہے۔