پاکستان اور جنوبی افریقہ کے درمیان جاری دوسرے ٹیسٹ میچ کے دوسرے روز کے اختتام پر مہمان ٹیم نے چار وکٹوں کے نقصان پر 185 رنز بنا لیے ہیں۔
منگل کو پنڈی کرکٹ سٹیڈیم میں جنوبی افریقہ کی جانب سے ٹرسٹن سٹبز 68 اور کائل ویرینے 10 رنز کے ساتھ ناٹ آؤٹ رہے۔
پاکستان کے 333 رنز کے جواب میں جنوبی افریقہ نے اپنی پہلی اننگز کا آغاز کیا تو 22 کے مجموعی سکور پر ریان ریکلٹن 14 انفرادی رنز بناکر شاہین آفریدی کا شکار بنے۔
اس کے بعد ٹونی ڈی زورزی 55، کپتان ایڈن مارکرم 32 اور ڈیوالڈ بریوس بغیر کوئی رن بنائے آؤٹ ہوئے۔
پاکستان کی جانب سے ڈیبیو کرنے والے آصف آفریدی نے دو جبکہ شاہین آفریدی اور ساجد خان نے ایک ایک وکٹ حاصل کی۔
اس سے قبل دوسرے روز کے کھیل میں پاکستان نے اننگز کا آغاز 259 رنز پانچ کھلاڑی آؤٹ سے کیا تو اس وقت سعود شکیل اور آغا سلمان بالترتیب 42 اور 10 رنز کے ساتھ کریز پرموجود تھے۔
دونوں بلے باز اننگز کو آگے بڑھاتے رہے، سعود شکیل نے نصف سینچری بھی مکمل کی تاہم سلمان آغا 45 رنز پر پویلین لوٹ گئے، اس کے تھوڑی دیر بعد سعود شکیل بھی 66 رنز پر آؤٹ ہو گئے۔
ان کے بعد آنے والوں میں سے کوئی بھی بلے باز ٹک نہ سکا۔ شاہین آفریدی صفر، ساجد خان چار اور آصف آفریدی پانچ رنز ہی بنا پائے، ان کو مہاراج نے پویلین کی راہ دکھائی جبکہ نعمان علی چھ رنز بنا کر ناٹ آؤٹ رہے۔جنوبی افریقہ کی جانب سے کیشوو مہاراج نے سات وکٹیں لیں جبکہ سائمن ہارمر نے ایک اور ربادا نے ایک وکٹ لی۔پہلے روز کا کھیل
پیر کو پاکستان نے ٹاس جیت کر بیٹنگ کا فیصلہ کیا تھا اور دن کے اختتام تک پاکستان نے 5 وکٹوں کے نقصان پ 259 رنز بنا لیے ہیں۔
پاکستان کی جانب سے محتاط آغاز کے باوجود امام الحق زیادہ دیر نہ ٹھہر سکے اور 17 کے سکور پر بولڈ ہو گئے، ان کے بعد آنے والے شان مسعود اور عبداللہ شفیق ذمہ دارانہ طور پر آگے بڑھتے رہے اور نصف سینچریز کرنے میں کامیاب رہے تاہم یہ پارٹنرشپ اس وقت ٹوٹی جب عبداللہ شفیق 57 رنز پر آؤٹ ہو گئے۔
ان کے بعد آنے والے بابر اعظم صرف 16 رنز ہی بنا پائے جبکہ ان کے بعد سعود شکیل بیٹنگ کے لیے آئے۔
پاکستان کے کپتان شان مسعود اچھی فارم میں نظر آ رہے تھے اور سینچری بنانے کے قریب ہی تھے کہ کیشو مہاراج کی گیند پر 87 رنز بنا کر کیچ آؤٹ ہو گئے۔
شان مسعود کی وکٹ کے بعد محمد رضوان نے کریز سنبھالی لیکن وہ زیادہ دیر تک میدان میں موجود نہ رہ سکے اور 19 رنز بنا کر کگیسو ربادا کے ہاتھوں آؤٹ ہوگئے۔
جنوبی افریقہ کی جانب سے سائمن ہارمر اور کیشو مہاراج نے دو، دو جبکہ کگیسو ربادا نے ایک وکٹ حاصل کی۔
اس ایونٹ کے لیے پاکستان کی ٹیم میں ایک تبدیلی کی گئی ہے اور حسن علی کو ڈراپ کرتے ہوئے آصف آفریدی کو موقع دیا گیا ہے۔
اس سے قبل لاہور کے قذافی سٹیڈیم میں ہونے والے پہلے ٹیسٹ میں پاکستان نے جنوبی افریقہ کو 93 رنز سے شکست دے کر سیریز میں ایک صفر کی برتری حاصل کر لی تھی۔
پاکستانی پلیئنگ الیون
پاکستان کی جانب سے میدان میں اترنے والی ٹیم میں ٹیم شان مسعود (کپتان)، عبداللہ شفیق، امام الحق، بابر اعظم، سعود شکیل، محمد رضوان، سلمان علی آغا، نعمان علی، ساجد خان، آصف آفریدی اور شاہین شاہ آفریدی شامل ہیں۔
جنوبی افریقن ٹیم
مہمان ٹیم ایڈم مارکرم (کپتان)، ریان رکلٹن، ٹرسٹن سٹبز، ٹونی ڈی زورزی، ڈیوالڈ بریوس، کائل ویریین، سینوران متھوسوامے، مارکو جینسن، سمن ہارمر، کیشو مہاراج اور کگیسو ربادا پر مشتمل ہے۔