اینٹی نارکوٹکس فورس نے ملک بھر میں منشیات اسمگلنگ کے خلاف بڑی کارروائیاں کرتے ہوئے 11 مختلف آپریشنز میں 11 ملزمان کو گرفتار کر لیا۔ کارروائیوں کے دوران مجموعی طور پر 26.577 کلوگرام منشیات برآمد کی گئیں جن کی مالیت 1 کروڑ 77 لاکھ روپے سے زائد بتائی جاتی ہے۔
اے این ایف کے مطابق ملزمان طلبہ کو منشیات فروخت کرنے میں ملوث تھے۔ کارروائی کے دوران ملتان میں شیر شاہ ٹول پلازہ کے قریب گاڑی سے 6 کلوگرام آئس برآمد کی گئی مانسہرہ میں کالج کے نزدیک موٹرسائیکل سوار سے 1.2 کلوگرام چرس اور اسلام آباد کی ایک یونیورسٹی کے باہر 1.262 کلوگرام چرس ضبط کی گئی۔
اٹک یونیورسٹی کے قریب 560 گرام چرس برآمد ،ملتان ایئرپورٹ پر سری لنکا جانے والے مسافر سے 660 گرام آئس ضبط کی گئی۔
پشاور کے باچا خان ایئرپورٹ پر دوحہ جانے والے مسافر سے 493 گرام آئس برآمد، جس میں 38 کیپسول پیٹ سے نکالے گئے
راولپنڈی کے چکلالہ کوریئر آفس میں جوتوں اور دیگر اشیاء میں چھپائی گئی 183 گرام ویڈ ،بیدیاں کلاں روڈ، قصور پر 9 کلو ہیروئن، کواڈ کاپٹر، 6 بیٹریاں، 2 ڈیوائسز اور ایک چارجر برآمد کر کے 2 ملزمان کو گرفتار کرلیا۔
ہیڈ بلوکی پر گاڑی سے 4.095 کلو ہیروئن اور 2.5 کلو آئس برآمد ہوئی اور 2 ملزمان کو گرفتار کیا گیا۔
ترجمان اے این ایف کے مطابق تمام کیسز میں انسدادِ منشیات ایکٹ 1997 کے تحت مقدمات درج کر کے مزید تحقیقات شروع کر دی گئی ہیں جبکہ ملک بھر میں منشیات فروشوں کے خلاف آپریشن مزید تیز کرنے کا اعلان کیا گیا ہے۔