جامعہ کراچی میں بچوں اور خواتین پر کتوں کے حملوں کا وزیر جامعات سندھ محمد اسماعیل راہو نے نوٹس لے لیا۔
وزیر جامعات سندھ نے جامعہ کراچی انتظامیہ سے رپورٹ طلب کرلی ہے، جبکہ اس سلسلے میں انہوں نے وائس چانسلر جامعہ کراچی سے رابطہ بھی کیا۔
وزیر جامعات محمد اسماعیل راہو نے وائس چانسلر کو ہدایت کی کہ جامعہ کے تمام داخلی و خارجی راستوں اور کیمپس میں روزانہ کی بنیاد پر صفائی اور اسٹریلائزیشن کا انتظام یقینی بنایا جائے۔
وائس چانسلر نے وزیر جامعات کو آگاہ کیا کہ جن افراد اور بچوں کو کتوں نے کاٹا ہے اُن کا علاج جاری ہے۔ انہوں نے مزید بتایا کہ اس سے قبل بھی کئی مرتبہ گلشن ٹاؤن انتظامیہ کو کتا مار مہم شروع کرنے کے لیے مراسلے بھیجے جا چکے ہیں۔
اس موقع پر وزیر جامعات سندھ محمد اسماعیل راہو نے گلشن ٹاؤن انتظامیہ کو فوری طور پر کتا مار مہم شروع کرنے کی ہدایت بھی جاری کردی۔