محکمہ تعلیم سندھ نے نجی اسکولوں کو ہدایت جاری کی ہے کہ طلبا کو سردیوں میں اپنی پسند کے گرم کپڑے، جیکٹ یا سوئیٹر پہننے کی اجازت دی جائے۔ اسکول انتظامیہ بچوں کو مخصوص کلر یا ڈیزائن کی جیکٹ پہننے پر مجبور نہیں کرے گی۔
ڈائریکٹوریٹ آف پرائیویٹ انسٹی ٹیوشنز کی ایڈیشنل ڈائریکٹر رفیعہ جاوید نے بتایا کہ وزیرِ تعلیم سندھ سردار شاہ کی ہدایت پر مراسلہ جاری کیا گیا ہے، اور خلاف ورزی کرنے والے اسکولوں کے خلاف کارروائی کی جائے گی۔
رفیعہ جاوید کا کہنا تھا کہ بچے کسی بھی رنگ اور ڈیزائن کی جیکٹ پہن سکتے ہیں اور زبردستی کسی مخصوص گرم لباس کی اجازت نہیں ہوگی۔ انہوں نے واضح کیا کہ سردیوں میں بچوں کی صحت اور سہولت اولین ترجیح ہے۔
صوبائی وزیر تعلیم سندھ سردار شاہ نے بھی کہا کہ نجی اسکولوں میں بچوں کی سہولت اور صحت کو مدنظر رکھتے ہوئے یہ ہدایت دی گئی ہے تاکہ طلبا سردیوں میں محفوظ اور آرام دہ لباس پہن سکیں۔