بھارت کے کھلاڑیوں نے اتوار کو ایشیا کپ رائزنگ اسٹارز ٹورنامنٹ میں اپنے بڑوں کی غیر اخلاقی روایات جاری رکھتے ہوئے پاکستان شاہین کی ٹیم کے کھلاڑیوں سے ہاتھ نہیں ملایا۔
ہاتھ نہ ملانے کا ڈرامہ بھارت نے ستمبر میں یو اے ای میں ہونے والے ایشیا کپ ٹورنامنٹ کے دوران شروع کیا تھا اور دیکھا دیکھی دوسرے کھیلوں میں بھی بھارت کے کھلاڑی یہی غیر اخلاقی حرکت دہرا رہے ہیں یہاں تک کہ آئی سی سی خواتین ورلڈ کپ میں بھی بھارتی ٹیم نے یہی حرکت کی ہے۔
تاہم بصارت سے محروم بھارت کی خواتین ٹیم نے ایک نئی مثال رکھی جب انہوں نے پاکستان کی خواتین ٹیم سے سری لنکا میں ہونے والے بلائنڈ کرکٹ ٹورنامنٹ میں ہاتھ بھی ملایا اور کھلاڑیوں نے ایک دوسرے کو اچھے کھیل پر شاباش بھی دی۔
اتوار کے دن ہی ہونے والے بلائنڈ کرکٹ ٹورنامنٹ میں بھارتی ٹیم نے پاکستان کو شکست دی لیکن میچ کے بعد ان کے کھلاڑیوں نے آکر نا صرف پاکستانی کھلاڑیوں سے ہاتھ ملایا بلکہ ان کے اچھے کھیل پر ان کی تعریف بھی کی۔