پنجاب کریکولم اینڈ ٹیکسٹ بک بورڈ اتھارٹی (پیکٹا) نے انٹرمیڈیٹ کے نئے نصاب کے مطابق تیار کردہ درسی کتابیں مارکیٹ میں فراہم کر دی ہیں تاکہ طلبہ کو نئے تعلیمی سال کے آغاز پر بروقت کتابیں میسر آ سکیں۔
پیکٹا کے مطابق انٹرمیڈیٹ کی آٹھ درسی کتابوں کو نیشنل کریکولم آف پاکستان کے مطابق ازسرنو مرتب کیا گیا ہے۔ حکام کا کہنا ہے کہ اس سے قبل انٹرمیڈیٹ کی کتابیں 2002 کے نصاب کے مطابق شائع کی جا رہی تھیں تاہم جدید تعلیمی ضروریات کو مدنظر رکھتے ہوئے ان میں جامع تبدیلیاں کی گئی ہیں۔
سی ای او پیکٹا سید موسیٰ رضا نے بتایا کہ نئے تعلیمی سیشن کے آغاز سے قبل تمام نئی کتابیں مارکیٹ میں پہنچا دی گئی ہیں تاکہ طلبہ کو بروقت نصابی کتب کی فراہمی یقینی بنائی جا سکے۔
پیکٹا کے مطابق نصاب میں تبدیلی کا مقصد تعلیمی نظام کو جدید تقاضوں سے ہم آہنگ کرنا اور طلبہ کو عصر حاضر کے مطابق معیاری تعلیم فراہم کرنا ہے۔ ادارے نے یاد دلایا کہ اس سے قبل نویں اور گیارہویں جماعت کی درسی کتابوں کو بھی نئے قومی نصاب کے مطابق اپ ڈیٹ کیا جا چکا ہے۔