آئی جی پنجاب ڈاکٹر عثمان انور نے پنجاب بھر میں پولیس افسران و اہلکاروں کی جانب سے سیاہ شیشوں اور بغیر نمبر پلیٹ گاڑیوں کے استعمال پر سخت نوٹس لیتے ہوئے فوری کارروائی کا حکم دے دیا۔
ترجمان پنجاب پولیس کے مطابق آئی جی پنجاب نے واضح ہدایات جاری کی ہیں کہ تمام سرکاری و نجی پولیس گاڑیاں اور موٹر سائیکلیں مکمل طور پر رجسٹریشن پلیٹ کے بغیر نہیں چل سکیں گی۔ ٹریفک قوانین دیگر شہریوں کی طرح پولیس افسران اور اہلکاروں پر بھی یکساں طور پر لاگو ہوں گے۔
ترجمان کے مطابق سیاہ شیشے لگانے، نمبر پلیٹ کے بغیر گاڑی یا موٹر سائیکل چلانے کی کسی بھی خلاف ورزی پر متعلقہ ایس ایچ اوز، انچارجز، ڈسٹرکٹ افسران اور یونٹس/فارمیشنز کے سربراہان براہِ راست ذمہ دار ہوں گے۔
پنجاب پولیس نے واضح کیا کہ ان قوانین کی خلاف ورزی پر نہ صرف افسران و اہلکاروں کے خلاف محکمانہ کارروائی کی جائے گی بلکہ مجاز سربراہان سے بھی پوچھ گچھ ہوگی۔
آئی جی پنجاب کا کہنا ہے کہ ٹریفک قوانین کی مکمل پاسداری پولیس فورس کے اندر قانون پسندی اور شفافیت کو یقینی بنائے گی۔