اداکار یاسر نواز کی جانب سے اہلیہ ندا یاسر کے حق میں بیان سامنے آنے کے بعد اداکارہ فضا علی نے سخت ردعمل دیا ہے جس کے بعد سوشل میڈیا پر بحث مزید شدت اختیار کر گئی ہے۔
واضح رہے کہ ندا یاسر حال ہی میں فوڈ ڈیلیوری رائیڈرز سے متعلق اپنے ایک بیان پر شدید عوامی تنقید کی زد میں آ گئی تھیں جس پر بعد ازاں انہوں نے معذرت بھی کر لی تھی۔ اس معاملے پر فضا علی ان شخصیات میں شامل تھیں جنہوں نے ندا یاسر کے بیان سے اختلاف کیا اور کہا کہ فوڈ ڈیلیوری رائیڈرز انتہائی محنتی لوگ ہوتے ہیں، انہیں تھوڑی سی ٹِپ دینا کسی پر بوجھ نہیں بنتا، اس لیے ان پر اس نوعیت کے الزامات نہیں لگائے جانے چاہییں۔
اس پر یاسر نواز نے اپنی اہلیہ کے حق میں بیان دیتے ہوئے کہا تھا کہ فضا علی بلاوجہ ندا یاسر کے پیچھے پڑی ہوئی ہیں۔
اب فضا علی نے یاسر نواز کے بیان پر سخت ردعمل دیتے ہوئے کہا ہے کہ ایک حقیقی مرد کبھی کسی عورت پر حملہ نہیں کرتا۔ ان کا کہنا تھا کہ یہ معاملہ دو خواتین کے درمیان تھا اور کسی مرد کا اس بحث میں شامل ہونا بالکل غلط ہے ایسے شخص کو حقیقی مرد نہیں کہا جا سکتا۔
فضا علی نے مزید کہا کہ وہ فارغ نہیں بیٹھی بلکہ اپنے کام پر توجہ دے رہی ہیں اور اپنے پلیٹ فارم پر حقیقی زندگی کے مسائل پر بات کرتی ہیں۔
اس معاملے پر سوشل میڈیا کچھ صارفین فضا علی کے مؤقف کی حمایت کرتے ہوئے کہہ رہے ہیں کہ انہوں نے درست بات کی جبکہ کچھ افراد یاسر نواز کے حق میں بولتے ہوئے کہتے ہیں کہ وہ ایک اچھے شوہر ہیں جو اپنی بیوی کے لیے کھڑے ہوئے۔
بعض صارفین کا کہنا ہے کہ یہ بحث بہت طول پکڑ چکی ہے اور اب اسے ختم ہو جانا چاہیے۔