معروف سینئر اداکارہ صبا فیصل نے اپنے وائرل بیانات پر وضاحت پیش کرتے ہوئے کہا ہے کہ ان کی بات کو غلط انداز میں سمجھا گیا جبکہ کچھ مقامات پر انہوں نے مناسب الفاظ کا انتخاب نہیں کیا جس پر وہ وضاحت اور معذرت کرنا چاہتی ہیں۔
صبا فیصل نے حال ہی میں انسٹاگرام پر ایک ویڈیو شیئر کی جس میں انہوں نے مارننگ شو میں دیے گئے اپنے بیانات کی وضاحت کی۔ ان بیانات پر سوشل میڈیا پر خاصی بحث دیکھنے میں آئی تھی۔
اپنی ویڈیو میں صبا فیصل نے کہا کہ وہ دو نکات پر بات کرنا چاہتی ہیں، ایک گونگا بہرا والی بات اور دوسرا بہو کے لباس سے متعلق بیان۔ انہوں نے وضاحت کی کہ جب انہوں نے کہا تھا کہ نئی نویلی دلہن کو گونگا اور بہرا ہونا چاہیے، تو ان کی اصل مراد درگزر اور برداشت تھی۔ ان کے مطابق وہ دراصل معاف کرنے کی بات کرنا چاہتی تھیں تاہم انہوں نے غلط لفظ استعمال کیا۔
صبا فیصل کا کہنا تھا کہ یہ بات صرف بہو پر لاگو نہیں ہوتی بلکہ سسرال کے دیگر افراد پر بھی یکساں طور پر لاگو ہونی چاہیے۔ اگر دونوں فریق درگزر سے کام لیں تو معاملات خود بخود آسان ہو جاتے ہیں۔
بہو کے لباس سے متعلق وضاحت کرتے ہوئے صبا فیصل نے کہا کہ انہوں نے یہ بات اس تناظر میں کی تھی کہ بعض ساسیں بہو کو کپڑوں کے لیے پیسے دے دیتی ہیں تاکہ وہ اپنی مرضی سے خریداری کرے لیکن ذاتی طور پر وہ یہ پسند کرتی ہیں کہ بہو کے ساتھ خود شاپنگ کریں تاکہ وہ خاندان کی اقدار اور انداز کی نمائندگی کرے۔
انہوں نے مزید کہا کہ ہر لڑکی ایک مختلف پس منظر سے آتی ہے اس کا رہن سہن اور طرزِ زندگی مختلف ہو سکتا ہے اور ہر عورت یہ چاہتی ہے کہ اس کی بہو میں اس کے خاندان کی جھلک نظر آئے۔ تاہم اس کا یہ مطلب ہرگز نہیں کہ بہو پر زبردستی کی جائے۔
صبا فیصل نے اپنے مداحوں سے مخاطب ہوتے ہوئے کہا کہ اگر ان کے بیان سے کسی کی دل آزاری ہوئی ہے تو وہ معذرت خواہ ہیں کیونکہ وہ اپنے مداحوں کو اپنے خاندان کی طرح سمجھتی ہیں اور اسی لیے وضاحت دینا ضروری سمجھا۔