پاکستانی ڈراما انڈسٹری کی معروف اداکارہ سارہ عمیر کی ایک نئی انسٹاگرام ریل سوشل میڈیا پر خاصی توجہ حاصل کر رہی ہے جس کے بعد مداحوں نے ان کا موازنہ بالی ووڈ اسٹار کرینہ کپور سے کرنا شروع کر دیا ہے۔
سارہ عمیر نے اپنے کیریئر کا آغاز کم عمری میں کیا تھا اور 2008 میں پی ٹی وی کے ڈراما ’’تھوڑا سا آسماں‘‘ سے شوبز میں قدم رکھا۔ ان کے مقبول ڈراموں میں روگ، کٹھ پتلی، تھوڑا سا آسماں اور مائے نی شامل ہیں۔ 2014 کے بعد شادی کے بعد سارہ عمیر شوبز سے دور ہو گئی تھیں تاہم حال ہی میں شو ’’تماشا‘‘ کے ذریعے ان کی واپسی ہوئی جس کے بعد وہ سوشل میڈیا پر بھی خاصی متحرک نظر آ رہی ہیں۔
حالیہ دنوں سارہ عمیر کی ایک ریل، جو بالی ووڈ گانے ’’تیرے لیے ہی بنی ہوں‘‘ پر بنائی گئی ہے وائرل ہو رہی ہے۔ اس ریل میں ان کا انداز، لباس اور تاثرات دیکھ کر کئی صارفین نے دعویٰ کیا کہ وہ بالکل کرینہ کپور سے مشابہت رکھتی ہیں خاص طور پر 90 کی دہائی کے کرینہ کپور کے اسٹائل سے۔
سوشل میڈیا پر اس ریل کے بعد ملے جلے ردعمل سامنے آئے ہیں۔ کچھ صارفین نے سارہ عمیر کو کرینہ کپور کی نقل کرنے پر تنقید کا نشانہ بنایا اور انہیں اپنا منفرد انداز اپنانے کا مشورہ دیا۔ ایک صارف نے لکھا کسی کی نقل کر کے کرینہ نہیں بنا جا سکتا جبکہ ایک اور نے کہا کہ خود جیسا رہنا ہی اصل خوبصورتی ہے۔
دوسری جانب کئی مداحوں نے سارہ عمیر کی خوبصورتی اور اعتماد کی تعریف بھی کی۔ بعض صارفین کا کہنا تھا کہ وہ کرینہ کپور سے بھی زیادہ خوبصورت لگ رہی ہیں جبکہ ایک مداح نے تبصرہ کیا بھارت میں کرینہ کپور ہیں اور پاکستان میں سارہ عمیر۔