معروف پاکستانی اداکارہ اور ٹی وی ہوسٹ نادیہ خان ایک بار پھر سوشل میڈیا پر بحث کا موضوع بن گئی ہیں جہاں ان کی بیٹے اذان کے ساتھ ایک شادی کی تقریب میں رقص کی ویڈیو نے سوالات کھڑے کر دیے ہیں۔
حال ہی میں نادیہ خان ایک مہندی کی تقریب میں اپنے بیٹے اذان کے ہمراہ رقص کرتی نظر آئیں۔ اس موقع پر نادیہ خان نے نیلے رنگ کا مخملی فرشی شلوار سوٹ زیب تن کیا جبکہ ان کے بیٹے نے سیاہ شلوار قمیص کے ساتھ شال اوڑھ رکھی تھی۔ دونوں نے بھارتی گانے سینیوریتا پر رقص کیا جس کی ویڈیو نادیہ خان نے خود اپنے انسٹاگرام اکاؤنٹ پر شیئر کی۔
ویڈیو منظرِ عام پر آتے ہی سوشل میڈیا صارفین کی جانب سے نادیہ خان کی حب الوطنی پر سوالات اٹھائے جانے لگے۔ متعدد صارفین نے اداکارہ کو تنقید کا نشانہ بناتے ہوئے کہا کہ وہ اکثر قومی معاملات پر سخت بیانات دیتی رہی ہیں لیکن خود ایک بھارتی گانے پر رقص کر رہی ہیں۔
ایک صارف نے لکھا یہ تو بھارتی گانا ہے، آپ کی حب الوطنی کہاں گئی؟جبکہ ایک اور صارف کا کہنا تھا جو دوسروں کو لیکچر دیتی تھیں آج خود بھارتی گانے پر ناچ رہی ہیں۔بعض صارفین نے حالیہ پاک بھارت کشیدگی کا حوالہ دیتے ہوئے بھی سوالات اٹھائے۔
واضح رہے کہ نادیہ خان حالیہ برسوں میں اپنی دوٹوک رائے، قومی جذبات کے اظہار اور ڈرامہ انڈسٹری پر تنقیدی بیانات کے باعث خبروں میں رہتی ہیں۔