کراچی سٹی کورٹ میں پیشی کے دوران یوٹیوبر ملزم رجب بٹ اور وکلا کے درمیان جھگڑے کی ویڈیو سوشل میڈیا پر وائرل ہو گئی۔
تفصیلات کے مطابق ریاض علی سولنگی ایڈووکیٹ نے بتایا کہ جب ملزم اپنے وکیل کے ساتھ عدالت میں داخل ہوا تو تقریباً 15 یا اس سے زائد نامعلوم افراد یا اس کے گارڈ بھی ساتھ تھے اور وہ وی لاگ بناتے ہوئے آرہے تھے۔ اس دوران ملزم نے ایک وکیل کو دھکا دیا اور دھمکیاں دیں جس کا منظر سوشل میڈیا پر وائرل ہو گیا۔وکلا کا کہنا ہے کہ وکلا کی تضحیک کسی صورت برداشت نہیں کریں گے، یہاں شہرت، پیسہ یا تعلقات نہیں چلتے۔
انہوں نے بتایا کہ پہلی پیشی کے بعد رجب بٹ نے وی لاگ میں بھی نازیبا الفاظ استعمال کیے اور وکلا کو ہدف بنایا، جس سے وکلا اور سولنگی ایڈووکیٹ کو دھمکی آمیز کالز موصول ہو رہی ہیں جس کی اطلاع کراچی بار ایسوسی ایشن کو دے دی گئی ہے۔ جھگڑے کے دوران موبائل فون بھی گرا اور ملزم کے گارڈز اسے لے گئے جس کی درخواست سٹی کورٹ تھانے میں جمع کرائی گئی ہے۔