پشاور میں دھند کے باعث باچاخان انٹرنیشنل ایئرپورٹ پر پروازیں متاثر ہونے لگیں۔
پاکستان ایئرپورٹ اتھارٹی کے مطابق دھند کے باعث باچاخان انٹرنیشنل ایئرپورٹ سے پروازوں کو مشکلات کا سامنا کرنا پڑ رہا ہے۔ اتھارٹی کے مطابق خراب موسم اور کم حدِ نگاہ کے باعث قطر ایئرویز کی پرواز اسلام آباد منتقل کردی گئی، جبکہ سلام ایئر کی مسقط سے آنے والی پرواز بھی لینڈ نہ کر سکی اور اسے خراب موسم کے باعث سیالکوٹ منتقل کر دیا گیا۔
پی اے اے کے مطابق فلائی عدیل کی ریاض سے آنے والی پرواز خراب موسم کے باعث کراچی منتقل کردی گئی، جبکہ سلام ائیر اور ایئر عربیہ کی پروازیں بھی اسی سبب تاخیر کا شکار ہیں۔
پاکستان ایئرپورٹ اتھارٹی کے مطابق دھند کے باعث حدِ نگاہ 300 سے 360 میٹر تک محدود ہے، اس صورتحال میں باچاخان انٹرنیشنل ایئرپورٹ پر پروازیں متاثر ہو رہی ہیں۔