پاکستان نے زمبابوے کو 9 وکٹوں سے شکست دے کر سہ ملکی انڈر 19 ون ڈے سیریز جیت لی۔
ہرارے میں کھیلے گئے سیریز کے فائنل میں پاکستان نے 159 رنز کا تعاقب صرف 16.2 اوورز میں 1 وکٹ کے نقصان پر کیا۔
پاکستان کی جانب سے سمیر منہاس 114 رنز بنا کر نمایاں رہے۔ محمد شایان 38 اور عثمان خان 2 رنز بنا کر ناٹ آؤٹ پویلین لوٹے۔
زمبابوے کی جانب سے لیروئے چِیوولا نے 1 وکٹ حاصل کی۔
قبل ازیں پاکستان کی دعوت پر پہلے بیٹنگ کرتے ہوئے زمبابوے کی ٹیم 158 رنز پر ڈھیر ہوگئی تھی۔
عمر زیب نے ابتداء میں ہی زمبابوے کے ٹاپ آرڈر کو تہس نہس کردیا اور صرف 15 کے مجموعی اسکور پر زمبابوے کی آدھی ٹیم پویلین لوٹ گئی تھی۔
مائیکل بلگناٹ (60) اور ٹٹنڈا چیموگورو (28 ناٹ آؤٹ) نے کچھ مزاحمت دکھاتے ہوئے ٹیم کا اسکور 158 تک پہنچانے میں اہم کردار ادا کیا۔
پاکستان کی جانب سے عمر زیب نے 4، عبدالسبحان نے 2 جبکہ محمد صیام، دانیال علی خان اور احمد حسین نے ایک ایک وکٹ حاصل کی۔