خیبر پختونخوا کے ضلع باجوڑ میں جماعت اسلامی کے صوبائی نائب امیر اور سابق صوبائی اسمبلی امیدوار مولانا وحید گل کی رہائش گاہ کو گزشتہ شب بم حملے کا نشانہ بنایا گیا۔ خوش قسمتی سے واقعے میں کوئی جانی نقصان نہیں ہوا، تاہم دھماکے کے نتیجے میں گھر، حجرہ اور ایک گاڑی کو شدید نقصان پہنچا۔
پولیس کے مطابق دھماکا خیز مواد مولانا وحید گل کے حجرے کے مرکزی گیٹ کے قریب نصب کیا گیا تھا۔ واقعے کے وقت مولانا وحید گل گھر پر موجود نہیں تھے۔
ڈی پی او باجوڑ وقاص رفیق نے بتایا کہ ابتدائی تحقیقات کے مطابق حملے میں آئی ای ڈی استعمال کی گئی۔ دھماکے کے فوراً بعد پولیس کی بھاری نفری نے جائے وقوعہ کو گھیرے میں لے کر شواہد اکٹھے کر لیے اور تفتیش کا آغاز کر دیا ہے۔