کاؤنٹر ٹیررازم ڈیپارٹمنٹ (سی ٹی ڈی) نے مختلف شہروں میں دہشت گردی کے ممکنہ خدشات کے پیش نظر کارروائیاں جاری رکھیں جن کے دوران ایک ہفتے میں 49 دہشت گردوں کو گرفتار کیا گیا۔ اسی دوران لاہور سے بھارتی خفیہ ایجنسی کا ایک ایجنٹ بھی حراست میں لیا گیا۔
حکام کے مطابق گرفتار بھارتی ایجنٹ کے قبضے سے بارودی مواد، اسلحہ اور اہم عمارتوں کے نقشے برآمد ہوئے ہیں جبکہ دیگر گرفتار دہشت گردوں کے قبضے سے دھماکا خیز مواد اور خودکش جیکٹ بنانے کا سامان بھی حاصل کیا گیا۔
سی ٹی ڈی حکام نے بتایا کہ گزشتہ ایک ماہ کے دوران مجموعی طور پر 6,131 کومبنگ آپریشنز کیے گئے، جن میں 599 مشتبہ افراد کو گرفتار کیا گیا۔ یہ کارروائیاں لاہور، راولپنڈی، جہلم، ٹوبہ ٹیک سنگھ، حافظ آباد، چکوال، گوجرانوالہ، ڈیرہ غازی خان اور فیصل آباد میں انجام پائیں۔
حکام کا کہنا ہے کہ دہشت گرد مختلف مقامات پر کارروائیاں کر کے عوام میں خوف و ہراس پھیلانے کا ارادہ رکھتے تھے۔ کومبنگ آپریشنز کے دوران مجموعی طور پر 2 لاکھ 43 ہزار 546 افراد سے پوچھ گچھ کی گئی۔