پنجاب اور سندھ پولیس کے مشترکہ گرینڈ آپریشن کے دوران رحیم یار خان کے کچے میں انتہائی مطلوب 62 ڈاکوؤں نے خود کو قانون کے حوالے کردیا جبکہ 50 سے زائد سہولت کار بھی گرفتار کرلیے گئے۔
پولیس کے مطابق جدید ٹیکنالوجی اور ڈرونز کی مدد سے ڈاکوؤں کے ٹھکانوں کا محاصرہ کیا گیا، جس کے بعد ڈاکو ساتھیوں سمیت ہتھیار ڈالنے پر مجبور ہوئے۔ ایک کروڑ روپے سر کی قیمت والے انتہائی مطلوب ڈاکو وہاب لونڈ اور میرا لٹھانی نے بھی سرینڈر کیا۔ لونڈ گینگ، کوش گینگ، لٹھانی گینگ اور سیکھانی گینگ کے دیگر افراد بھی قانون کے سامنے پیش ہوئے۔
ڈی آئی جی غازی صلاح الدین کا کہنا ہے کہ اس آپریشن میں 2 ہزار سے زائد پولیس اہلکار، 8 ڈرون ٹیمیں اور درجنوں بکتر بند گاڑیاں حصہ لے رہی ہیں۔
سرینڈر کرنے والے ملزمان کو عدالتوں میں پیش کیا جائے گا، ان سے کوئی مقابلہ نہیں کیا جائے گا، تاہم ریاست کا مقابلہ کرنے والوں کے خلاف سخت اقدامات کیے جائیں گے۔
پولیس حکام نے بتایا کہ کچے کے علاقوں میں مکمل حکومتی رٹ قائم ہونے تک آپریشن جاری رہے گا۔