وارسا میں غیر قانونی امیگریشن اور انسانی اسمگلنگ کے تدارک کے لیے چھ یورپی ممالک کے وزرائے داخلہ کی اہم کانفرنس منعقد ہوئی جس کی قیادت پاکستان کے وزیر داخلہ محسن نقوی نے کی۔
کانفرنس میں پولینڈ، ایسٹونیا، لٹویا، فن لینڈ اور لتھوانیا کے وزرائے داخلہ نے حصہ لیا اور غیر قانونی امیگریشن کے مسئلے پر تفصیلی تبادلہ خیال کیا۔ شریک ممالک نے پاکستان کی کاوشوں کو سراہا اور پاکستان کے شہریوں کے لیے آفیشل سطح پر روزگار کے مواقع فراہم کرنے پر اتفاق کیا۔
وزیر داخلہ محسن نقوی نے اجلاس میں پاک افغان سرحدی صورتحال پر بریفنگ دیتے ہوئے بتایا کہ افغانستان میں 22 دہشت گرد تنظیمیں منظم ہو رہی ہیں اور پاکستان دنیا اور افغانستان میں دہشت گردوں کے درمیان مضبوط دیوار کی حیثیت رکھتا ہے۔
کانفرنس کے اختتام پر تمام ممالک نے باہمی تعاون کو مضبوط کرنے اور غیر قانونی امیگریشن کے خلاف مشترکہ حکمت عملی اپنانے کے عزم کا اعادہ کیا۔