امریکی اور اسرائیلی فوجوں نے ایران پر مشترکہ فضائی و میزائل حملے کیے جن کے نتیجے میں تہران سمیت کئی علاقوں میں دھماکے ہوئے۔ ایرانی میڈیا کے مطابق تہران کے مشرق اور شمالی علاقوں میں کم از کم تین دھماکے سنے گئے۔
غیر ملکی خبر ایجنسی کے مطابق اسرائیل نے تہران کے مہرآباد ائیرپورٹ کو نشانہ بنایا جبکہ ایران کے دیگر شہروں اصفہان، قم، کرج، کرمانشاہ، لورستان اور تبریز میں بھی دھماکے ہوئے۔ ایرانی صدارتی محل اور سپریم لیڈر آیت اللہ خامنہ ای کے کمپاؤنڈ کے قریب سات میزائل گرے، اور کچھ شہری زخمی ہوئے۔
امریکی عہدیداروں کے مطابق صدر ڈونلڈ ٹرمپ ایران کی جانب سے یورینیم افزودگی کی ڈیل نہ ہونے پر ناراض تھے، اور حملے فضا اور سمندر سے کیے گئے۔ اسرائیلی وزیر دفاع نے بھی تہران پر حملے کی تصدیق کی، اور کہا کہ یہ پیشگی کارروائی اسرائیل کے دفاع کے لیے کی گئی۔
ایران نے اپنے جوابی حملے کے لیے تیاریاں شروع کر دی ہیں اور اسرائیل کے شمالی علاقوں کی جانب میزائل داغے ہیں۔ اسرائیل نے اسکول بند کر دیے اور شہریوں کو گھروں میں رہنے کی ہدایت جاری کی۔
قطر میں امریکی سفارتخانے کے اہلکاروں کو بھی شیلٹر میں جانے کی ہدایت دی گئی ہے، جبکہ کئی ممالک نے اپنے شہریوں کو فوری طور پر ایران چھوڑنے کی ہدایات جاری کر دی ہیں۔