ایرانی میڈیا کے مطابق اسرائیل نے دارالحکومت تہران میں حکومتی ہیڈکوارٹرز اور صدارتی محل پر پیشگی فضائی حملے کیے ہیں۔ رپورٹ میں بتایا گیا ہے کہ تہران میں کم از کم تین زور دار دھماکوں کی آوازیں سنی گئی ہیں جس کے بعد شہر میں خوف و ہراس پھیل گیا۔
میڈیا رپورٹس کے مطابق متعدد میزائل تہران کی یونیورسٹی روڈ اور جمہوریہ ایریا میں گرے، جبکہ ایران کے دیگر شہروں جیسے اصفہان، کرمانشاہ اور قم میں بھی دھماکے سنے گئے۔
اسرائیلی وزیر دفاع نے تہران پر حملے کی تصدیق کی اور کہا کہ یہ کارروائی اسرائیل کے دفاع کے لیے کی گئی ہے۔ ایرانی حکام نے ابھی تک جانی یا مالی نقصان کی تفصیلات جاری نہیں کی ہیں، تاہم سیکیورٹی اور امدادی ادارے متحرک ہو گئے ہیں۔
اسرائیلی میڈیا کے دعوے کے مطابق حملے میں اعلیٰ حکومتی عہدیدار کو بھی نشانہ بنایا گیا۔ روئٹرز کے مطابق ایران کے سپریم لیڈر آیت اللہ خامنہ ای تہران میں موجود نہیں ہیں اور انہیں محفوظ مقام پر منتقل کر دیا گیا ہے۔