ایران نے امریکا اور اسرائیل کی جانب سے تہران پر کیے گئے حملوں کے بعد شدید مؤقف اپناتے ہوئے کہا ہے کہ ہمارا ردعمل انتہائی سخت ہوگا اور اختتام اب حملہ آوروں کے اختیار میں نہیں رہا۔
ایرانی اور غیر ملکی میڈیا رپورٹس کے مطابق امریکہ اور اسرائیل کی جانب سے ایران کے دارالحکومت تہران، اصفہان، تبریز، قم اور کرج میں فضائی اور میزائل حملے کیے گئے۔ تہران کے مضافات میں میزائل حملوں کے بعد دھویں کے بادل بلند ہوتے دیکھے گئے، تاہم ابھی تک کسی جانی نقصان کی تصدیق نہیں ہوئی۔
اسرائیلی حکام نے کہا کہ حملوں میں ایران کی سرکاری عمارتوں اور فوجی تنصیبات کو نشانہ بنایا گیا۔
ایرانی عہدیداروں نے امریکی و اسرائیلی کارروائی پر سخت ردعمل کا اعلان کرتے ہوئے کہا کہ ایران جوابی کارروائی کی تیاری میں ہے اور حملہ آوروں کو اس کا سخت جواب ملے گا۔ ایران کی پارلیمانی قومی سلامتی کمیٹی کے سربراہ نے واضح کیا کہ اس معاملے کا اختتام اب حملہ آوروں کے اختیار میں نہیں رہا۔