وزیر دفاع خواجہ آصف نے ایران پر مسلط کی جانے والی جنگ کو صیہونیت کی عالمی سازش قرار دیتے ہوئے کہا ہے کہ ایجنڈا اسرائیلی اثر کو پاکستان کی سرحد تک پہنچانا ہے۔
وزیر دفاع نے کہا کہ اسرائیل کے قیام سے آج تک اسلامی دنیا پر آنے والی ہر آفت کے پیچھے صیہونی نظریہ ہے۔ صیہونیت نے ایک صدی سے عالمی اقتصادی نظام پر کنٹرول حاصل کر رکھا ہے اور بڑی طاقتیں اس کے زیر اثر ہیں۔
خواجہ آصف نے کہا کہ پاکستان ایٹمی طاقت ہے اور ہماری مسلح افواج کی صلاحیت دنیا تسلیم کرتی ہے۔ انہوں نے واضح کیا کہ پاکستان نے ایٹمی دھماکے کر کے یہ ثابت کیا کہ ملک ایک مضبوط ایٹمی قوت ہے۔
انہوں نے کہا کہ ایران پر جنگ مسلط کی گئی اور افغانستان، اسرائیل اور بھارت کا ممکنہ مشترکہ ایجنڈا پاکستان دشمنی پر مبنی ہو سکتا ہے جسے قوم کو سمجھنا ہوگا۔ اللہ عالم اسلام کو اتحاد و اتفاق اور اپنے دشمنوں کو پہچاننے کی توفیق عطا فرمائے۔ فلسطین آزاد ہو۔ ہمارا وطن قیامت تک مضبوط اور سلامت رہے۔