سرگودھا کے نواحی علاقے بھاگٹانوالہ میں ایک دل دہلا دینے والا واقعہ پیش آیا جہاں شوہر نے مبینہ طور پر کلہاڑی کے وار کرکے اپنی بیوی اور پانچ بچوں کو ہلاک کردیا۔
پولیس حکام کے مطابق ابتدائی معلومات کے مطابق ملزم کو اپنی بیٹی کے کردار پر شک تھا جس کے باعث اس نے اپنے چار بیٹے، ایک بیٹی اور بیوی کو قتل کرنے کا یہ خوفناک اقدام کیا۔
واقعے کے بعد ملزم نے خود کو بھی شدید زخمی کرلیا جس کے بعد اسے فوری طور پر قریبی اسپتال منتقل کیا گیا ہے۔ پولیس کا کہنا ہے کہ ملزم کی حالت بہتر ہونے پر اس سے تفصیلی تفتیش کی جائے گی۔
پولیس نے بتایا کہ مقتول بچوں کی عمریں ایک سے 16 سال کے درمیان تھیں اور لاشوں کو پوسٹ مارٹم کے لیے اسپتال منتقل کردیا گیا ہے۔