جناح انٹرنیشنل ایئرپورٹ پر پاکستان کسٹمز نے دبئی سے آنے والے مسافر سے لاکھوں روپے مالیت کے قیمتی پروسیسرز برآمد کرلیے۔
حکام کے مطابق دبئی سے آنے والی پرواز کے ایک مشکوک مسافر نے گرین چینل کے ذریعے نکلنے کی کوشش کی۔ کسٹمز عملے نے جب اسے رکنے کا اشارہ کیا تو مسافر نے فرار ہونے کے لیے انٹرنیشنل ارائیول ہال کے ایگزٹ گیٹ کی طرف دوڑ لگا دی، تاہم کسٹمز اہلکاروں نے مستعدی دکھاتے ہوئے اسے ہال سے باہر ہی قابو کرلیا۔
جامہ تلاشی کے دوران مسافر کے جسم سے 102 قیمتی پروسیسرز برآمد ہوئے جن کی مالیت 70 لاکھ روپے سے زائد بتائی جا رہی ہے۔
کسٹمز حکام نے برآمد شدہ سامان کسٹمز ایکٹ کے تحت ضبط کرلیا جبکہ ملزم کے خلاف مزید قانونی کارروائی جاری ہے۔