کراچی کے ڈسٹرکٹ سٹی کے علاقے بغدادی میں لڑائی جھگڑے کے دوران فائرنگ کے نتیجے میں ایک خاتون جاں بحق جبکہ تین افراد زخمی ہوگئے۔
پولیس کی ابتدائی معلومات کے مطابق فائرنگ سے جاں بحق ہونے والی خاتون کی شناخت گل صباء کے نام سے ہوئی ہے جبکہ زخمیوں میں سید زمان، عبدالرحمٰن اور شمس الزمان شامل ہیں، جنہیں فوری طور پر اسپتال منتقل کردیا گیا ہے۔
پولیس نے بروقت کارروائی کرتے ہوئے واقعے میں ملوث 5 ملزمان کو گرفتار کرلیا ہے جن کی شناخت محمد حیات، شاہ فہد، شاہ خالد، شاہ فیصل اور شاہ سعود کے ناموں سے ہوئی ہے۔
ملزمان کے قبضے سے اسلحہ، چاقو اور ڈنڈے بھی برآمد کر لیے گئے ہیں۔ واقعے کی اطلاع ملتے ہی ایس ڈی پی او بغدادی، ڈی ایس پی اور ایس ایچ او موقع پر پہنچ گئے جبکہ کرائم سین یونٹ کی ٹیم نے بھی شواہد اکٹھے کرنے کا کام شروع کر دیا ہے۔
پولیس حکام کا کہنا ہے کہ واقعے کی باقاعدہ تحقیقات کا آغاز کردیا گیا ہے اور تمام پہلوؤں سے معاملے کا جائزہ لیا جا رہا ہے۔