خیبر پختونخوا کے ضلع بنوں میں دہشت گردوں نے پولیو مہم کے دوران تین اہلکاروں کو اغوا کرلیا ہے۔
پولیس ذرائع کے مطابق یہ افسوسناک واقعہ جھنڈوخیل کے علاقے میں اس وقت پیش آیا جب کریم اللہ، مشکوٰۃ اللہ اور شاہ زیب نامی پولیو ورکرز اپنی پیشہ ورانہ ذمہ داریاں ادا کرنے کے لیے تعینات تھے۔
ابتدائی اطلاعات میں بتایا گیا ہے کہ نامعلوم مسلح افراد نے ان تینوں اہلکاروں کو بنیادی مرکزِ صحت (بی ایچ یو) غازی مرجان سے زبردستی اغوا کیا اور نامعلوم مقام کی طرف فرار ہوگئے۔
واقعے کی اطلاع ملتے ہی پولیس اور سیکیورٹی فورسز کی بھاری نفری جائے وقوعہ پر پہنچ گئی اور پورے علاقے کو گھیرے میں لے کر دہشت گردوں کی تلاش کے لیے بڑے پیمانے پر سرچ آپریشن شروع کردیا گیا ہے۔
پولیس حکام کا کہنا ہے کہ علاقے کے داخلی اور خارجی راستوں کی ناکہ بندی کردی گئی ہے اور واقعے کی مزید تحقیقات جاری ہیں تاکہ مغوی ورکرز کی بحفاظت واپسی کو یقینی بنایا جاسکے۔
ضلع بنوں اور گرد ونواح میں اس واقعے کے بعد پولیو ٹیموں کی سیکیورٹی مزید سخت کردی گئی ہے۔