لاہور میں عیدالاضحیٰ کے موقع پر شہر میں قربانی کی کھالیں غیر قانونی طور پر جمع کرنے اور دیگر خلاف ورزیوں کے خلاف پولیس کی کارروائیاں جاری ہیں۔
ڈی آئی جی آپریشنز محمد فیصل کامران کے مطابق ضلعی انتظامیہ کی اجازت کے بغیر کھالیں جمع کرنے پر کارروائی کرتے ہوئے 45 افراد کو گرفتار کیا گیا ہے، جبکہ اس سلسلے میں 38 مقدمات بھی درج کیے جا چکے ہیں۔
انہوں نے بتایا کہ صرف چیریٹی کمیشن کے ساتھ رجسٹرڈ اداروں کو کھالیں جمع کرنے کی اجازت ہے، اور اس حوالے سے پولیس کی نگرانی سخت کر دی گئی ہے۔
ڈی آئی جی آپریشنز کے مطابق رہائشی علاقوں میں سری پائے تیار کرنے اور کھلے عام بھوننے والوں کے خلاف بھی کارروائیاں کی جا رہی ہیں۔ اس سلسلے میں 38 افراد کو گرفتار اور 26 مقدمات درج کیے گئے ہیں۔
انہوں نے کہا کہ عید کے ایام میں شاہراؤں، گلیوں اور چوراہوں میں سری پائے بھوننے پر پابندی عائد ہے۔
محمد فیصل کامران نے مزید بتایا کہ عید کے روز ہوائی فائرنگ کا کوئی واقعہ رپورٹ نہیں ہوا، جبکہ ون ویلنگ اور پتنگ بازی کی روک تھام کے لیے بھی مؤثر حکمت عملی اپنائی گئی ہے۔
انہوں نے شہریوں سے اپیل کی کہ کسی بھی غیر قانونی سرگرمی کی اطلاع فوری طور پر پولیس کو دیں۔