کراچی میں سندھ رینجرز کے کیمپ پر حملے میں گرفتار زخمی دہشت گرد نے دورانِ تفتیش اعتراف کیا ہے کہ وہ افغانستان کے شہر جلال آباد سے پاکستان آیا تھا اور اس کا تعلق کالعدم تنظیم جماعت الاحرار سے ہے۔
ملزم عثمان علی کے مطابق وہ تین دیگر ساتھیوں کے ساتھ سات روز قبل پاکستان پہنچا تھا جبکہ حملے میں استعمال ہونے والا اسلحہ وزیرستان سے لایا گیا تھا۔ اس نے بتایا کہ رینجرز کیمپ پر دستی بم اس کے ساتھی جانان نے پھینکا، جبکہ فرار کے دوران وہ خود گولی لگنے سے زخمی ہو گیا۔
پولیس کے مطابق حملے میں ملوث مرکزی دہشت گرد عبدالہادی مارا جا چکا ہے جبکہ دیگر ملزمان کے حوالے سے تحقیقات جاری ہیں۔