حکومت پنجاب نے صوبے بھر میں دفعہ 144 کے تحت کھلی فضا میں ڈرون اُڑانے پر عائد پابندی میں مزید 30 روز کی توسیع کردی ہے۔
محکمہ داخلہ پنجاب کے مطابق سیکیورٹی خدشات کے پیشِ نظر آؤٹ ڈور ڈرون کے استعمال پر مکمل پابندی برقرار رہے گی، جبکہ ہالز اور مارکیز کے اندر منعقد ہونے والی تقریبات میں چھوٹے ڈرون کے محدود استعمال کی اجازت ہوگی۔
ترجمان محکمہ داخلہ کا کہنا ہے کہ اندرونی تقریبات میں ڈرون کے محفوظ استعمال کی ذمہ داری منتظمین پر عائد ہوگی، جبکہ انٹیلی جنس اور قانون نافذ کرنے والے اداروں کو اس پابندی سے استثنیٰ حاصل ہوگا۔
سیکریٹری داخلہ پنجاب نے یہ پابندی ضابطہ فوجداری 1898 کے سیکشن 144(6) کے تحت عائد کی ہے۔
ترجمان کے مطابق عوام کے جان و مال کے تحفظ، امن و امان کے قیام اور املاک کی حفاظت کو یقینی بنانا حکومت کی اولین ترجیح ہے، اسی مقصد کے تحت صوبے بھر کی انتظامیہ اور پولیس کو احکامات پر سختی سے عمل درآمد کی ہدایت جاری کی گئی ہے۔