روسی ماہرِ آبی پالیسی ڈاکٹر روکسولانا زیگون نے خبردار کیا ہے کہ بھارت کی جانب سے پاکستان کے پانی کے بہاؤ کو محدود کرنے کی کوئی بھی کوشش بین الاقوامی قوانین کی خلاف ورزی اور خطے کے امن و استحکام کے لیے خطرہ ثابت ہوسکتی ہے۔
ایک سیمینار سے خطاب کرتے ہوئے ڈاکٹر روکسولانا زیگون نے کہا کہ سندھ طاس معاہدہ دنیا کے کامیاب ترین آبی معاہدوں میں شمار ہوتا ہے، جو جنوبی ایشیا میں آبی وسائل کی منصفانہ تقسیم کی بنیاد فراہم کرتا ہے۔
انہوں نے کہا کہ پاکستان کی 90 فیصد سے زائد زراعت دریائی پانی پر انحصار کرتی ہے، جبکہ 21 بڑے پن بجلی منصوبے بھی دریائے سندھ کے نظام سے وابستہ ہیں۔
روسی ماہر نے خبردار کیا کہ دریاؤں کے بہاؤ میں کسی بھی قسم کی تبدیلی پاکستان کی زراعت، غذائی تحفظ اور معیشت پر سنگین اثرات مرتب کر سکتی ہے۔ ان کا کہنا تھا کہ بالائی علاقوں میں مزید ڈیموں کی تعمیر دونوں ایٹمی طاقتوں کے درمیان کشیدگی میں اضافے کا سبب بن سکتی ہے۔
ڈاکٹر زیگون نے زور دیا کہ سندھ طاس معاہدے میں کسی بھی فریق کو یکطرفہ طور پر دستبردار ہونے کا اختیار حاصل نہیں ہے اور تنازعات کے حل کے لیے مستقل انڈس کمیشن ہی مناسب فورم ہے۔
انہوں نے یہ بھی کہا کہ سیلاب سے متعلق پیش گوئیوں اور ہائیڈرولوجیکل معلومات کے تبادلے سمیت تکنیکی تعاون میں کمی مستقبل میں غیر یقینی صورتحال اور بحرانوں کے خطرات کو بڑھا سکتی ہے۔
روسی ماہرِ آبی پالیسی نے اس بات پر زور دیا کہ سیاسی مقاصد کے لیے سندھ طاس معاہدے کو کمزور کرنا خطرناک ہوگا، جبکہ مشترکہ آبی وسائل پر تعاون ہی خطے میں امن اور استحکام کی ضمانت ہے۔
انہوں نے واضح کیا کہ یہ رائے سندھ طاس معاہدے اور علاقائی آبی مسائل کے حوالے سے ان کے تجزیے اور مشاہدات کی عکاس ہے۔