پاکستان کرکٹ بورڈ کے زیرِ اہتمام انڈر 19 اسکلز ڈویلپمنٹ کیمپ ملتان میں جاری ہے، جس میں 31 کھلاڑی شریک ہیں۔
کیمپ کے دوران کوچز اور ٹرینرز کھلاڑیوں کی تکنیکی اور ذہنی صلاحیتوں میں بہتری لانے کے لیے کام کر رہے ہیں۔ ہیڈ کوچ شاہد انور نے کھلاڑیوں کو دورہ انگلینڈ، اے سی سی انڈر 19 مینز ایشیا کپ اور انڈر 19 ورلڈ کپ کے تناظر میں مستقبل کے اہداف اور وژن پر خصوصی لیکچر دیا، اور زور دیا کہ وہ نظم و ضبط، محنت اور مستقل مزاجی کے ذریعے پاکستان انڈر 19 ٹیم میں اپنی جگہ بنائیں۔
یہ اسکلز ڈویلپمنٹ کیمپ اگست کے آخری ہفتے میں اختتام پذیر ہوگا، جس کے بعد پاکستان انڈر 19 ٹیم ستمبر میں انگلینڈ کا دورہ کرے گی جہاں وہ ایک چار روزہ اور چار ایک روزہ میچوں کی سیریز کھیلے گی۔
واضح رہے کہ پاکستان انڈر 19 ٹیم ایشیا کی موجودہ چیمپئن ہے، جس نے فائنل میں بھارت کو شکست دے کر اے سی سی مینز انڈر 19 ایشیا کپ کا ٹائٹل اپنے نام کیا تھا۔