وزیرِ اعظم شہباز شریف کی زیرِ صدارت نوجوانوں کو روزگار کی فراہمی سے متعلق ایک اہم جائزہ اجلاس منعقد ہوا جس میں ملکی افرادی قوت، بالخصوص نوجوانوں، کو بیرونِ ملک روزگار کے مواقع فراہم کرنے کے لیے مختلف اقدامات کا جائزہ لیا گیا۔
اجلاس سے خطاب کرتے ہوئے وزیرِ اعظم نے ہدایت کی کہ بیرونِ ملک پاکستانی سفارتخانے پاکستانی افرادی قوت کے لیے روزگار کے نئے مواقع تلاش کرنے کی کوششوں میں تیزی لائیں اور مختلف ممالک میں دستیاب ملازمتوں اور مطلوبہ مہارتوں کا ڈیٹا بروقت فراہم کریں۔ انہوں نے پروٹیکٹریٹ آف امیگریشن کے تمام نظام کو ڈیجیٹل بنانے کی بھی ہدایت کی۔
شہباز شریف نے کہا کہ پاکستان کی افرادی قوت باصلاحیت ہے اور حکومت انہیں عالمی معیار کی تعلیم، فنی تربیت اور بین الاقوامی سطح پر رسائی فراہم کرنے کے لیے ہر ممکن اقدامات کر رہی ہے۔ انہوں نے ہدایت کی کہ وزارتِ سمندر پار پاکستانی، نیشنل ووکیشنل اینڈ ٹیکنیکل ٹریننگ کمیشن (نیوٹیک) اور وزیرِ اعظم یوتھ پروگرام نوجوانوں کو ہنر، مختلف زبانوں کے کورسز اور بین الاقوامی معیار کی سرٹیفکیشنز فراہم کرنا یقینی بنائیں۔
وزیرِ اعظم نے مزید ہدایت کی کہ پاکستانی سرٹیفکیشنز کو عالمی معیار سے ہم آہنگ کرنے کے لیے متعلقہ ادارے مختلف ممالک کے ساتھ روابط مضبوط کریں جبکہ جن ممالک میں پاکستانی ہنرمندوں کے لیے روزگار کے زیادہ مواقع موجود ہیں، وہاں کی زبانوں کی تعلیم اور سرٹیفکیشنز بھی فراہم کی جائیں۔
اجلاس کو بریفنگ میں بتایا گیا کہ ڈیجیٹل یوتھ ہب پر اب تک 8 لاکھ نوجوان رجسٹر ہو چکے ہیں۔ بریفنگ کے مطابق بیرونِ ملک تعمیرات، زراعت، سیاحت، صحت، ٹرانسپورٹ، بائیوٹیکنالوجی، مینوفیکچرنگ، شپ بلڈنگ، انفارمیشن ٹیکنالوجی، انجینئرنگ، نرسنگ، دواسازی اور اشیائے خورونوش کی تیاری سمیت مختلف شعبوں میں روزگار کے وسیع مواقع موجود ہیں، جن کے لیے پاکستانی نوجوانوں کی تربیت جاری ہے۔
بریفنگ میں مزید بتایا گیا کہ مختلف ممالک میں موجود پاکستانی سفارتخانے دستیاب ملازمتوں اور مطلوبہ قابلیت سے متعلق معلومات ڈیجیٹل یوتھ ہب پورٹل پر فراہم کریں گے تاکہ نوجوان بروقت رہنمائی حاصل کر سکیں۔
اجلاس میں اسحاق ڈار، مصدق ملک، عطاء اللہ تارڑ، چوہدری سالک حسین، بلال اظہر کیانی، چیئرمین نیوٹیک راجا قمر الاسلام، چیئرمین وزیرِ اعظم یوتھ پروگرام رانا مشہود احمد خان اور دیگر متعلقہ اعلیٰ حکام نے شرکت کی۔