فیفا ورلڈ کپ 2026 میں شرکت کے بعد مصر کی قومی فٹبال ٹیم وطن واپس پہنچ گئی، جہاں کھلاڑیوں کا شاندار استقبال کیا گیا۔
قاہرہ ایئرپورٹ پر حکام اور انتظامیہ نے قومی ٹیم کا خیرمقدم کیا جبکہ کھلاڑیوں کے استقبال کے لیے بڑی تعداد میں مداح بھی موجود تھے۔ ایئرپورٹ سے باہر نکلتے ہی شائقین نے اپنے پسندیدہ کھلاڑیوں کو گھیر لیا، ان کے ساتھ تصاویر بنوائیں اور بھرپور محبت کا اظہار کیا۔
بعد ازاں قومی ٹیم کھلی بس میں مختلف علاقوں سے گزری، جہاں سڑکوں کے دونوں اطراف قومی پرچم تھامے شہری اپنے ہیروز کی ایک جھلک دیکھنے کے لیے جمع تھے۔ مداحوں نے مصر اور قومی ٹیم کے حق میں نعرے لگائے، جبکہ کھلاڑیوں نے ہاتھ ہلا کر عوام کے جذبات کا جواب دیا۔
ورلڈ کپ میں ٹیم کی کارکردگی پر مصری عوام نے اپنے کھلاڑیوں کو بھرپور خراجِ تحسین پیش کیا اور ان کی حوصلہ افزائی کی۔