روس کے دارالحکومت ماسکو میں پہلی بار روبوٹس کی علامتی شادی کی تقریب منعقد کی گئی، جس کی ویڈیو سوشل میڈیا پر تیزی سے وائرل ہو رہی ہے۔
تقریب ماسکو کی ایک لائبریری میں منعقد ہوئی جہاں "رابرٹ" اور "میٹلڈا" نامی دو روبوٹس کو علامتی طور پر میاں بیوی قرار دیا گیا۔
وائرل ویڈیو میں روبوٹس کو موسیقی کی دھن پر رقص کرتے اور شادی کی دیگر رسومات میں حصہ لیتے دیکھا جا سکتا ہے۔ تقریب کے دوران دونوں روبوٹس کو ویڈنگ بریسلیٹس بھی پہنائے گئے، جس نے شرکاء کی توجہ اپنی جانب مبذول کرائی۔
منتظمین کے مطابق "رابرٹ" کو ایک آفس ورکر اور بلاگر کے طور پر ڈیزائن کیا گیا ہے، جبکہ "میٹلڈا" ایک بیلرینا روبوٹ ہے۔ اس منفرد تقریب کا مقصد مصنوعی ذہانت اور جدید روبوٹکس کی صلاحیتوں کو دلچسپ انداز میں پیش کرنا تھا۔
یہ انوکھی تقریب اور اس کی ویڈیوز سوشل میڈیا صارفین میں خوب مقبول ہو رہی ہیں، جہاں لوگ اس پر دلچسپ تبصرے بھی کر رہے ہیں۔