مشرق وسطیٰ میں ایران اور امریکا کے درمیان جاری کشیدگی اور عالمی منڈی میں خام تیل کی بلند قیمتوں کے باوجود پاکستان اسٹاک ایکسچینج میں مسلسل دوسرے روز بھی شاندار تیزی دیکھنے میں آئی جہاں سرمایہ کاروں کی بھرپور خریداری کے باعث کاروبار مثبت زون میں بند ہوا۔
کاروباری دن کے دوران مارکیٹ میں آغاز سے ہی تیزی کا رجحان برقرار رہا اور ایک موقع پر ہنڈرڈ انڈیکس 3 ہزار 145 پوائنٹس تک بڑھ گیا۔ مارکیٹ نے 176 ہزار، 177 ہزار اور 178 ہزار پوائنٹس کی تین اہم نفسیاتی حدیں بھی دوبارہ عبور کر لیں۔
کاروبار کے اختتام پر پاکستان اسٹاک ایکسچینج کا ہنڈرڈ انڈیکس 2 ہزار 837 پوائنٹس کے نمایاں اضافے کے ساتھ 178 ہزار 123 پوائنٹس پر بند ہوا۔
مارکیٹ میں فرٹیلائزر، بینکنگ، سیمنٹ اور انرجی سیکٹر کی کمپنیوں کے شیئرز میں نمایاں خریداری دیکھی گئی، جس نے مجموعی مارکیٹ کو سہارا دیا۔