پاکستان اسٹاک ایکسچینج میں منافع کے حصول کے لیے شیئرز کی فروخت کے دباؤ کے باعث تیزی کا ابتدائی رجحان محدود ہو گیا اور کاروبار کا اختتام بمشکل مثبت زون میں ہوا۔
امریکی اور ایران کے مابین جنگ بندی اور مذاکرات کی بحالی کی توقعات پر مارکیٹ کا آغاز زبردست تیزی کے ساتھ ہوا، تاہم بعد میں پرافٹ ٹیکنگ سے 2400 پوائنٹس کا بڑا اضافہ زائل ہو کر محض 200 پوائنٹس تک سیمٹ گیا۔
کاروباری دن کے دوران مارکیٹ میں 177,000 اور 178,000 پوائنٹس کی دو اہم سطحیں بحال تو ہوئیں لیکن برقرار نہ رہ سکیں، تاہم ہنڈریڈ انڈیکس 176,000 پوائنٹس کی حد بحال رکھنے میں کامیاب رہا۔ کاروبار کے اختتام پر کراچی اسٹاک ایکسچینج کا ہنڈریڈ انڈیکس 205 پوائنٹس کے اضافے کے ساتھ 176,133 پوائنٹس پر بند ہوا۔
مارکیٹ بروکرز کے مطابق سیشن کے دوران سیمنٹ، بینکنگ اور ٹیکنالوجی شعبے کی کمپنیوں کے شیئرز میں خریداروں کی دلچسپی دیکھی گئی، جبکہ آئل اینڈ گیس، انرجی، ریفائنری اور فارماسیوٹیکل کمپنیوں کے شیئرز پر فروخت کا دباؤ غالب رہا۔