پاکستان کے سابق وزیراعظم اور معروف کرکٹر عمران خان کا بھارت میں واقع ننھیال کا آبائی گھر ایک بار پھر لوگوں کی توجہ کا مرکز بن گیا۔ ایک بھارتی کانٹینٹ کریئیٹر نے جالندھر میں موجود اس تاریخی حویلی کو تلاش کرکے اس کی ویڈیو سوشل میڈیا پر شیئر کی، جس کے بعد عمران خان کے مداحوں نے اس میں خاص دلچسپی کا اظہار کیا۔
عمران خان کا ننھیال بھارت کے شہر جالندھر سے تعلق رکھتا ہے۔ ان کی والدہ کے خاندان نے تقسیم ہند کے دوران یہ گھر چھوڑ کر پاکستان ہجرت کی تھی۔ عمران خان مختلف مواقع پر اپنی والدہ سے جڑی یادوں اور ان کے ہجرت کے تجربات کا ذکر کرتے رہے ہیں۔
بھارتی کانٹینٹ کریئیٹر کے مطابق عمران خان کے ننھیال کی اس حویلی کا نام ’امانت منزل‘ ہے۔ یہ عمارت آج بھی اپنی اصل طرز اور ساخت میں بڑی حد تک محفوظ ہے، جبکہ موجودہ طور پر ایک مقامی سیاسی تنظیم کی ملکیت میں بتائی جاتی ہے اور وہاں ہجرت کرکے آنے والے افراد رہائش پذیر ہیں۔
حویلی کی تصاویر اور ویڈیو سامنے آنے کے بعد سوشل میڈیا صارفین نے عمران خان سے اپنی وابستگی کا اظہار کیا۔ بعض افراد نے ان کے لیے دعائیں کیں، جبکہ کئی صارفین نے عمارت کی موجودہ حالت اور اس کے تاریخی انداز کو سراہا۔
یہ حویلی عمران خان کی ذاتی زندگی کے اس حصے سے جڑی ہوئی ہے جو تقسیم ہند، ہجرت اور ان کے ننھیال کی خاندانی تاریخ سے متعلق ہے، اسی لیے اس کی دوبارہ منظرِ عام پر آنے والی تصاویر نے لوگوں کی توجہ حاصل کی ہے۔