بالی ووڈ کے معروف اداکار ارجن رامپال نے اپنی دیرینہ دوست اور فیشن ڈیزائنر گیبریلا ڈی میٹریڈس کے ساتھ سادگی سے شادی کرلی۔
بھارتی میڈیا کے مطابق 53 سالہ ارجن رامپال اور 39 سالہ گیبریلا نے گوا میں قریبی دوستوں کی موجودگی میں کورٹ میرج کی۔ جوڑے نے ریاست کے یونیفارم سول کوڈ کے تحت اپنی شادی رجسٹرڈ کرائی۔
رپورٹس کے مطابق دونوں نے شادی کے لیے 15 روزہ قانونی مدت سے خصوصی چھوٹ حاصل کی، تاہم انہیں شادی کا سرٹیفکیٹ 15 روز بعد جاری کیا جائے گا۔
ارجن رامپال اور گیبریلا 2018 سے ایک ساتھ ہیں اور ان کے دو بیٹے بھی ہیں۔ اداکار نے گزشتہ سال ایک پوڈکاسٹ میں گیبریلا سے منگنی کی تصدیق کی تھی۔
ارجن رامپال کی اس سے قبل سابق سپر ماڈل مہر جیسیا سے شادی ہوئی تھی جو 20 سال بعد طلاق پر ختم ہوگئی۔ دونوں کی دو بیٹیاں ہیں۔