آسٹریلوی سائنس دانوں نے قدرتی آفات میں ملبے تلے پھنسے افراد تک ادویات پہنچانے کے لیے خصوصی سائبورگ کاکروچ تیار کرلیے ہیں، جنہیں ’پیرا بورگز‘ کا نام دیا گیا ہے۔
غیر ملکی میڈیا کے مطابق یہ کاکروچز کیمروں اور انجیکشن آلات سے لیس ہیں جبکہ ان کے اعصابی نظام میں الیکٹروڈز نصب کرکے انہیں دور سے کنٹرول کیا جاسکتا ہے۔
محققین کے مطابق یہ سائبورگ کاکروچ تنگ اور دشوار راستوں سے گزر کر متاثرین تک ادویات پہنچا سکتے ہیں۔ تجربات میں دوا پہنچانے کی کامیابی کی شرح 72 فیصد جبکہ قریبی فاصلے پر 95 فیصد رہی۔
سائنس دانوں کا کہنا ہے کہ مستقبل میں یہ ٹیکنالوجی زلزلوں، عمارتیں گرنے اور دیگر ہنگامی حالات میں پھنسے افراد کی جان بچانے میں مددگار ثابت ہوسکتی ہے۔