ڈنمارک میں گھر کے باغ میں صفائی کے دوران ایک شخص نے وائکنگ عہد کا اب تک کا سب سے بڑا چاندی کا خزانہ دریافت کرلیا۔
شمالی ڈنمارک کے علاقے ریبلڈ میں باغ کی صفائی کے دوران ملنے والے خزانے میں تقریباً 700 اشیا شامل ہیں، جن میں تھور ہیمر، زیورات، چاندی کی سلاخیں، کٹی ہوئی چاندی اور 47 سکے شامل ہیں۔
خزانے کا مجموعی وزن تقریباً 18.5 کلوگرام ہے، جو اس سے قبل دریافت ہونے والے خزانے سے تقریباً تین گنا زیادہ ہے۔ ماہرین کے مطابق دریافت ہونے والی اشیا میں 10ویں صدی عیسوی کا لکڑی کا برتن بھی شامل ہے۔
ماہرین کا کہنا ہے کہ وائکنگ دور میں چاندی کو ادائیگی کے لیے استعمال کیا جاتا تھا اور اس کی قدر وزن کے مطابق طے ہوتی تھی۔ دریافت ہونے والے عرب اور اینگلو سیکسن سکوں سے اس دور میں اسلامی دنیا، انگلینڈ اور وائکنگ معاشروں کے درمیان تجارتی و ثقافتی روابط کا بھی پتا چلتا ہے۔