بھارت میں چوری کے خوف سے شہری نے اپنی نئی گاڑی کو محفوظ رکھنے کے لیے انوکھا طریقہ اختیار کرلیا۔
بھارتی ریاست بہار کے شہر گوپال گنج میں منوج یادو نے اپنی نئی مہندرا اسکارپیو کلاسک کو کرین کی مدد سے گھر کی دوسری منزل کی چھت پر پہنچا دیا۔
سوشل میڈیا پر وائرل ویڈیو میں گاڑی کو کرین کے ذریعے ہوا میں اٹھا کر گھر کی چھت پر منتقل کرتے دیکھا جاسکتا ہے۔
رپورٹس کے مطابق منوج یادو اسرائیل میں ملازمت کرتے ہیں اور انہوں نے گاڑی ایک ڈرائیور کے سپرد کی تھی، تاہم ڈرائیور کے چلے جانے کے بعد گاڑی کی سیکیورٹی سے متعلق خدشات پیدا ہوئے جس پر خاندان نے گاڑی چھت پر رکھنے کا فیصلہ کیا۔ واقعے کی ویڈیو سوشل میڈیا پر تیزی سے وائرل ہوگئی۔