عمان کے تاریخی شہر مسقط کے ساحلی علاقے متراہ میں زیرِ تعمیر کیبل کار منصوبہ اپنے آخری مراحل میں داخل ہوگیا ہے۔
عمان میڈیا کے مطابق متراہ ٹیلی فیرک نے بین الاقوامی حفاظتی جانچ کا اہم مرحلہ مکمل کرلیا ہے۔ منصوبے کی حتمی منظوری سول ڈیفنس اینڈ ایمبولینس اتھارٹی، رائل عمان پولیس اور مسقط میونسپلٹی سے حاصل کی جائے گی جس کے بعد اسے عوام کیلئے کھول دیا جائے گا۔
منصوبے کے تینوں اسٹیشنز کی تعمیر مکمل ہوچکی ہے، جن میں سلطان قابوس پورٹ، ماؤنٹین یا سمٹ اور حی الوَرد اسٹیشن شامل ہیں۔
متراہ کیبل کار کیلئے 18 کیبنز تیار کیے گئے ہیں۔ عام کیبن میں 8 جبکہ وی آئی پی کیبن میں 4 مسافروں کی گنجائش ہوگی، جبکہ دو وی آئی پی کیبنز خصوصی استعمال کیلئے مختص ہیں۔
حکام نے منصوبے کے باضابطہ افتتاح اور عوام کیلئے سروس شروع کرنے کی حتمی تاریخ کا اعلان تاحال نہیں کیا۔ منصوبے کو عمان وژن 2040 کے تحت سیاحت کے فروغ اور متراہ کے تفریحی منظرنامے میں اہم اضافہ قرار دیا جا رہا ہے۔