بھارت کی ریاست مہاراشٹرا کے ضلع ناسک کے قصبے نپھاڑ میں آوارہ کتوں کے مسئلے پر انتظامیہ کی عدم التفات کے خلاف ایک منفرد احتجاج دیکھنے میں آیا۔
آوارہ کتوں کے خلاف کارروائی نہ ہونے پر برہم مظاہرین نگر پنچایت کے چیف آفیسر دھیرج بھامرے کے دفتر میں داخل ہوگئے، جہاں یوا سینا کے ضلعی سربراہ وکرم راندھوے نے بوری میں لائے گئے کتے نکال کر افسر کی میز پر چھوڑ دیے۔
اس کے ساتھ ہی مظاہرین نے چیف آفیسر کو احتجاجاً نوٹوں کی مالا پہنانے کی بھی کوشش کی۔
مظاہرین کا موقف تھا کہ علاقے میں آوارہ کتوں کی بھرمار کے باعث بچوں، بزرگوں، خواتین اور ڈرائیوروں کو شدید مشکلات کا سامنا ہے اور کتوں کے کاٹنے کے واقعات میں مسلسل اضافہ ہو رہا ہے، مگر اس کے باوجود انتظامیہ اس سنجیدہ مسئلے کے حل کے لیے کوئی مؤثر اقدام نہیں کر رہی۔