فرانس کے ایک قصبے میں مچھروں کی بڑھتی تعداد سے پریشان ہوکر میئر نے ان کی پرواز پر پابندی عائد کردی جسے سوشل میڈیا پر دلچسپ انداز میں دیکھا جا رہا ہے۔
فرانس کے قصبے سینٹ جسٹ سینٹ ریمبرٹ کے میئر اولیور جولی نے یکم ستمبر کو حکم نامے پر دستخط کیے، جس کے تحت قصبے کی حدود میں دن اور رات کے اوقات میں ٹائیگر مچھروں کی پرواز پر پابندی عائد کی گئی۔
حکم نامے میں مچھروں کے کاٹنے سے ہونے والی خارش اور شہریوں کو درپیش پریشانی کا ذکر کیا گیا ہے جبکہ خلاف ورزی کرنے والے مچھروں کے لیے سزا کی شق بھی شامل ہے۔
میئر نے میڈیا کو بتایا کہ اب تک کسی مچھر کو گرفتار یا سزا نہیں دی جاسکی۔ تاہم حکم نامے کا اصل مقصد مچھروں کی افزائش روکنا اور ان سے پھیلنے والی بیماریوں کے خطرے کو کم کرنا ہے۔
شہریوں کو پانی جمع نہ ہونے دینے اور گٹروں سمیت پانی کے ذخائر کو ڈھانپ کر رکھنے کی ہدایت بھی کی گئی ہے۔