چین کے صوبہ ہیبئی کے ایک گاؤں میں کینسر کے عارضے میں مبتلا 70 سال سے زائد عمر کی خاتون کو خاندان کی جانب سے مردہ سمجھ کر تابوت میں رکھے جانے کے بعد ان کے اچانک زندہ ہونے کا عجیب واقعہ سامنے آیا ہے۔
کینسر کا علاج ناامید ہونے پر اہلخانہ خاتون کو گھر لے آئے تھے، جہاں 8 ستمبر کو زندگی کی کوئی علامت نہ پا کر رشتے داروں نے انہیں ایک ایسے خاص تابوت میں رکھ دیا جس میں جسم کو محفوظ رکھنے کے لیے مناسب ٹھنڈک کا انتظام تھا۔
اگلی شام خاتون کی بہو نے تابوت کے اندر سے پراسرار آوازیں سنیں، جس پر خاندان نے فوری طور پر انہیں باہر نکالا۔ 11 ستمبر کو قصبے سے باہر کے رشتے داروں کی آمد پر خاتون نے آنکھیں کھول لیں اور ان کا شعور بحال ہوگیا، تاہم ان کی حالت بدستور انتہائی نازک تھی۔ اس کے بعد 12 ستمبر کی شب خاتون کا انتقال ہوگیا اور 13 ستمبر کو انہیں سپرد خاک کردیا گیا۔
اس واقعے کی کہانی آن لائن وائرل ہونے پر لوگوں نے اس کی صداقت پر سوالات اٹھائے، تاہم مقامی گاؤں کے ایک عہدیدار نے واقعے کی تصدیق کی ہے۔
عہدیدار کے مطابق تابوت میں منجمد کرنے کے بجائے ایک خاص درجہ حرارت برقرار رکھا گیا تھا، جس کی بدولت خاتون کا مسموم جسمانی نظام دوبارہ بحال ہوگیا تھا جس میں پہلے بظاہر زندگی کے آثار ختم ہوچکے تھے۔