شمالی نصف کرے میں موسم خزاں کا آغاز ہوگیا، 23 ستمبر کو اعتدالِ خریفی کے موقع پر دن اور رات کا دورانیہ تقریباً برابر ہوگیا۔
اعتدالِ خریفی ہر سال 21 سے 24 ستمبر کے درمیان ہوتا ہے، جب سورج خطِ استوا کے اوپر سے گزرتا ہے اور تقریباً عین مشرق سے طلوع اور مغرب میں غروب ہوتا ہے۔
ماہرین کے مطابق زمین اپنے محور پر تقریباً 23.5 ڈگری جھکی ہوئی ہے اور یہی جھکاؤ موسموں کی تبدیلی کی بنیادی وجہ ہے۔ سال میں دو مرتبہ اعتدالِ ربیعی اور اعتدالِ خریفی کے موقع پر دن اور رات کی لمبائی تقریباً برابر ہوتی ہے۔
شمالی نصف کرے میں اب خزاں کا موسم شروع ہوگیا ہے، جبکہ جنوبی نصف کرے میں بہار کا آغاز ہوگا۔ سال کا مختصر ترین دن 21 دسمبر کو ہوگا۔