تھائی لینڈ کے دارالحکومت بنکاک میں سیلاب سے بھری سڑک پر جیٹ سکی چلانے والے شہری کو پولیس نے گرفتار کرلیا۔
واقعہ نیو فیچابوری روڈ پر پیش آیا، جہاں شدید بارشوں کے بعد سڑکیں سیلابی پانی میں ڈوبی ہوئی تھیں۔ سوشل میڈیا پر وائرل ویڈیو میں شہری کو پانی میں تیز رفتاری سے جیٹ سکی چلاتے اور خطرناک موڑ کاٹتے دیکھا جاسکتا ہے۔
جیٹ سکی سے اٹھنے والی لہریں قریبی گھروں تک پہنچیں، جس کے باعث بعض رہائشیوں کی املاک کو نقصان پہنچنے کی اطلاعات سامنے آئیں۔
گرفتاری کے بعد شہری نے پولیس کو بتایا کہ اسے ٹریفک قوانین کا علم نہیں تھا اور ایک غیر ملکی دوست نے اسے ویڈیو بنانے کی ترغیب دی تھی۔ اس کا دعویٰ تھا کہ وہ سیلاب سے پریشان لوگوں کا حوصلہ بڑھانا چاہتا تھا تاہم اس کی یہ کوشش اسے پولیس اسٹیشن پہنچا گئی۔