جاپان میں نیند کی کمی ایک سنجیدہ مسئلہ بن چکی ہے لیکن ٹوکیو میں اسی مسئلے کی طرف توجہ دلانے کے لیے ایک انوکھا طریقہ اپنایا گیا جہاں لوگوں کو کام کرنے نہیں بلکہ سکون سے سونے پر ہزاروں ڈالرز کا انعام دیا گیا۔
ٹوکیو میں منعقد ہونے والے اس منفرد مقابلے کو میٹ ریس کا نام دیا گیا۔ درجنوں افراد آرام دہ گدوں پر لیٹے اور انہیں 90 منٹ کے اندر جلد از جلد گہری اور پُرسکون نیند حاصل کرنے کا چیلنج دیا گیا۔
شرکاء کے سروں پر خصوصی آلات لگائے گئے تھے جو ان کی نیند کی نگرانی کرتے رہے۔ ماحول کو مزید آرام دہ بنانے کے لیے کچھ لوگ اپنے پسندیدہ نرم کھلونے بھی ساتھ لے کر آئے۔
مقابلے کی خاص بات اس کا انعام تھا جس کی مجموعی مالیت 20 لاکھ جاپانی ین سے زیادہ، یعنی تقریباً 14 ہزار امریکی ڈالرز بتائی گئی۔ فاتح کا فیصلہ صرف زیادہ دیر سونے پر نہیں بلکہ اس بات پر کیا گیا کہ کون کتنی جلدی سویا اور اس کی نیند کتنی گہری اور پُرسکون رہی۔
مقابلے کا اہتمام کرنے والی کوالا سلیپ جاپان کے مطابق اس سرگرمی کا بنیادی مقصد تفریح سے زیادہ ایک اہم مسئلے کی طرف توجہ دلانا تھا۔ منتظمین چاہتے تھے کہ مصروف زندگی گزارنے والے لوگ اچھی اور مکمل نیند کی اہمیت کو سمجھیں۔
2021 کے OECD اعداد و شمار کے مطابق جاپان میں لوگوں کی روزانہ اوسط نیند تقریباً 7 گھنٹے 24 منٹ تھی، جو تنظیم کے رکن ممالک میں سب سے کم اوسط میں شمار ہوئی۔ دیر رات تک مصروف رہنا اور طویل سفر جیسے عوامل بھی جاپان میں کم نیند کی اہم وجوہات سمجھے جاتے ہیں۔